'E quatte stagione | dialetto | Giovi55 | Rosso Venexiano -Sito e blog per scrivere e pubblicare online poesie, racconti / condividere foto e grafica

Login/Registrati

Commenti

Sostieni il sito

iscrizioni
 
 

Nuovi Autori

  • Gloria Fiorani
  • Antonio Spagnuolo
  • Gianluca Ceccato
  • Mariagrazia
  • Domenico Puleo

'E quatte stagione

Voglio 'na casa addò pozzo vede' 'a terra, 'o mare,
pecchè mm'aggia guarda' tutt'ê staggione.
P'â fenesta 'mme seguo 'o cagno 'e scena
e 'mme vesto a siconda 'e ll'occasione.
Voglio fa' 'o guitto, 'o commediante po' ll'attore:

ma aggia essere d'â natura 'o spettatore.
Ogni staggione se cagna 'nnu sipario:
j' 'mme guardo spettacule senza n'orario.
Ll'autunno accummencia a studa' 'o sole:
'o tiempo s'è 'nnu poco affievulito.

'Na timmida lucella trase p'â stanza:
tutto se tegne 'e foglie raggrinzite.
'E culure 'e 'sti mise autunnale,
se pigliene 'o mmarrone d'ê ccastagne.
Nucelle e nnoce vanno a servizio

'e n'autunno ca pare ca se lagna.
'O sole se studa troppo ambressa,
se fa pigra 'a jurnata d'â matina.
Attuorno tutto se tegne 'e giallo
e ll'uva è pronta p'addeventà vino.

A vvierno veco 'o mare rattristato,
'a luce trase fioca p'â fenesta.
E' scuro e j' annante 'o fuculare,
mm'assetto cu pane, noce e aspetto mesta.
Po' aroppo 'na longa e fredda attesa,

'na luce arrogantemente trase.
'O mare alleramente chiamma 'o sole:
se votta preputente dint'ê ccase.
Se sente 'nu prufummo ca sturdisce:
È 'a vita ca tutta 'nsieme rifiurisce...

'Nu viento e primmavera se scatena:
piante, ciure e animale fanno 'a scena.
Po' vene ll'estate tutta cucente:
'o mare s'allerea e se fà vullente.
'A ggente dinto ll'acqua se nne và,

mme pare ca se torna a battezza'.
'A 'sta fenesta se guardane 'e staggione:
nun haje 'o tiempo e te sfastedia'.
Quanta spettacule sape da 'a natura.
J' aspetto. Nun me movo: resto ccà a guarda'...
Giovanna Balsamo

Cerca nel sito

Cerca per...

Sono con noi

Ci sono attualmente 2 utenti e 5117 visitatori collegati.

Utenti on-line

  • Ardoval
  • Antonio.T.