'E quatt'asse

Pe mme 'a vita è 'nu bbello juoco 'e carte:
faccio 'o mazziere: piglio 'o mazzo e 'o sparto.

Modestamente, songo 'o rre d'ê pacche:
'e fesse mm'e ll'arravogljo: mm'ê 'nfizzo dint'ê ssacche.

Tengo 'a mana lesta e mme piace e fa' 'o 'mbruglione:
è 'na manera bbona pe ddegnere 'o vurzone.

J' 'a ggente m'â pazzeo e llà accummencia 'o spasso:
dint'â maneca tengo sempe pronte ll'asse.

Nun me piace fatica' e spisso vaco a scrocco:
si tengo ll'esigenza mm'acchiappo 'o primmo allocco.

Si 'ncoccio 'nu piseme ca nisciuno se sceroppa,
j' 'o dongo a bbere chiacchiere cu ll'assetielle 'e coppa.

Si 'ncontro 'na capa, 'nu pucurillo scaurata,
'o sfido a dduello cu ll'assetielle 'e spata.

Quanno pò mme capita 'nu miezo fetentone,
ll'abboffo e mazzate cu ll'asse e bbastone.

A 'nnu certo mumento: va buò là scasso 'e bbrutto.
'E stracce a tutte quante cu n'asso pigliatutto.
Giovanna Balsamo