'A farfalla

Comm'â 'nu curiannolo te nne vaje vulanno.
T'appuose, aggire e po' vaje sfrugulianno.
Si 'nnu pezzullo 'e carta c'appiccia 'a fantasia:
delicata t'appuoje 'ncoppa 'a mana mia.

Mme faje ridere pecchè sì palummella.
Te nne vaje vulanno pe 'ncoppa 'e campanelle.
Sì leggiera ma chesto 'nun te 'mporta,
vaje addò te capita e addò 'o viento te porta.

Tiene 'na vita corta pecchè sì 'na farfalla,
pe chesto faje 'a cianciosa cu 'e scelletelle gialle.
Stanca t'appuoje 'ncoppa a n'atu ciore,
faje 'o sentimento cu 'o petalo ca addora.

Te piace e te mustrà pecchè sì culurata,
nun saje ca 'a vita toja è llonga 'na nuttata.
'ntanto ca vaje 'ncantanne e spargenne 'sti culure,
sentenneme leggiera faccio 'a farfalla j' pure...
Giovanna Balsamo