'A pollece

Comm'â 'na pollece, 'me 'nfezzasse 'mpietto a tte,
'nzerranneme dint'ô calore 'e chistu core.
Ascesse ogni ttanto pe piglia' 'nu filo d'aria
e po' turnasse 'nsino a tte a mme nzerra'.

Tu sentenne 'nu leggiero pizzicore:
tuccannete 'mpietto m'accarezzasse.
Purtannete 'a mana 'a vocca me vasasse
e tutto chesto senza te n'adduna'.

Pazziasseme 'nu poco acchiapparella,
cu mme ca te sciuliasse dint'ê mmane.
Facesseme capriole miezo 'ô lietto
e ammore mmiezo 'e cuscine d'ô divano.

Po' mme fermasse pe 'nun te fa stanca'
e 'mpietto a tte venesse ancora a mme 'nzerra'.
'E notte quanno 'a luna 'ncielo sponta,
muvenneme te facesse stà scetato:

pe guarda' nsieme a te 'e sstelle,
comme fosseme 'a sempe 'nammurate.
Po' nsilenzio e senza mme fa vede'
m'addurmesso comm'â 'na nenna 'mbraccio a tte.
Giovanna Balsamo