Festa 'ncielo e festa 'nterra

 

 Mamma mia, che ccosa bbella;
è n’ammòre…guarda ccà!…
Tutte chesti rundinèlle,
’nmiez’ a chest’azzurrità!…
 
Aria fine… tiémpo bello…
e n’addòre ’e casatiéllo
ca ’mprufùma ’sta città.
 
Fèsta ’nciélo e fèsta ’ntèrra;
mamma mia, che ccosa bbella!…
 
- …E  fernìmmela sta guerra
vonno di’ chesti ccampane
ca nun stràcquano ’e sunà. -
 
Comme sònano: - Ndì mbòoo!… -
Comme sònano: - Ndì mbàaa!… -
 
’Nu mutìvo dint’ a ll’aria:
saglie ’nciélo, scénne ’ntèrra
va dicénno ca ogge è Pasca
e ogni ccòre hadda sapè;
se ne va benedicènno
pace e ammore ’a ccà e ’a llà.
 
È risorto Ggiesù Cristo;
 pe’ scetà ll’umanità
’ncannaruta d’ ’e ricchezze
e no ’a ll’opere ’e pietà.
 
E fernìmmela sta guerra;
basta cu’ odio e ’nfamità.
 
’E ssentìte ’sti ccampane
ca nun stracquano ’e sunà?
 
Comme sònano: - Ndì mboò… -
Comme sònano: - Ndì mbàaa!… -
 
Ogge è Pasca
e ogni ccòre hadda sape’ !…