Scritto da © Antonio Cristof... - Sab, 20/04/2013 - 04:10
FILOSOFIA
(Dimane penzo a ‘e diebbete, ma oggi so’ ‘nu Re!)
Dalla mia raccolta “’O cielo a cupertelle”
‘Na zuppa ‘e cozze
abbascio Mergelline,
a Piedigrotta,
fore addu Marchese(1).
‘Na capunata
cu’ ‘nu quarto ‘e vine,
zeppole, panzarotte
e trippa appese.
‘Na zuppa ‘e cozze
abbasce Mergelline!
Amico mio,
nun ce sta niente ‘a fa’,
t’hè(2) ‘a fa capace
che pe’ putè campà
ce basta ‘o ppoco,
‘o ppoco ‘e giuventù
che sta ‘int’’o core
e bussa sempre cchiù
e bussa sempe cchiù…
‘Na pizza fritta
‘nterre addu Triunfo(3),
chiena ‘e fuscella(4)
e cicoli in fragranza.
‘Nu ‘mbriacone
ca se tira ‘o runfo (5)
ch’’e cosce stese
e ‘e mmane ‘ncopp’’a panza.
‘Na pizza fritta
‘nterra addù Triunfo!
Amico mio,
hai voglia ‘e me guardà!
Te ‘a fa capace:
vale cchiù chestu ccà.
Vale cchiù chesto,
in fondo, sai pecchè?
Io campo meglio ‘e te!
Assai cchiù meglio ‘e te!
Tu pienze all’oggi,
all’oggi po’ ddimane.
Ce pienze e a faticà
vaie ‘ncopp’’a scola.
Io, invece, stongo
‘a sette settimane
tutt’’e jurnate
dint’’a do’ ‘on Nicola,
‘na tratturia che de’
‘na cosa grande!
Amico mio,
mò nun ce penzà cchiù!
Fatica sì,
ma fallo comme a me.
Sarrà dimane…
sarrà…che nun sarrà…
fa comme a me
ca oggi so ‘nu Rre…
Oggi, songo ‘nu Rre!
(1)Nota birreria napoletana.
(2)Ti devi.
(3)Nota pizzeria napoletana.
(4)Ricotta.
(5)Che russa.
»
- Blog di Antonio Cristoforo Rendola
- 1593 letture