nun tenesse 'o tiempo 'e mme guardà 'nfaccia!
Si fosse n'ora tenesse 'e tiempo n'ora surtanto,
ma 'e n'ora sulamente, che mme ne faccio?
Si fosse nu mese, ncopp'ô foglio 'e calennario,
mme cuntasse ogni mminuto e qquarto d'ora.
E si nun abbastasse e si a quaccosa servesse,
mme sparagnasse vulentiere 'e fa' 'a cuntrora.
Si fosse tiempo cercasse d'allungà 'a nuttata:
ogn'attimo 'e luce fosse tiempo guaragnato!
Mmece 'o tiempo 'e ssulo na sbattuta 'e mane:
pe ttramente c'avuote ll'uocchie è ggià dimane.
E si mettenne 'o tiempo 'int'â nu carusiello,
o ll'annascunnesse sotto 'a na mattunella:
riuscesse a fermà 'o juorno fatto 'e ore fernute
e ogni sscesa putesse addeventà sagliuta?
E si nfezzanneme dint'â vvicule e ttraverze,
fra na preta e n'ata truvasse 'o tiempo perzo?
Si putesse alluntanà chella brutta faccia scura,
chillu viso tutt'osse ca me fa mettere appaura!
Si annanze 'o fuosso nun me tremmasse a voce.
Si tenesse 'o curaggio 'e Cristo nfaccia 'a croce;
forze tenesse ggenio 'e cantà chella canzona:
'a solita; chella bbella, chella ca m'appassiona!
Ma 'o tiempo scorre, nisciuno mmaje ll'ha fermato:
chello ca mo' è presente fra n'ora ggià è passato.
E allora lasso perdere: parlo sulo pe spassatiempo,
continuo a gghi' annanze; ma comme fuje 'o tiempo!
- Blog di Giovi55
- Login o registrati per inviare commenti
- 5331 letture